ILOILO – Kanselado na ang klase sa Huasiong College of Iloilo humalin sa Kinder garten tubtob High School humalin bwas nga adlaw tubtob lunes sa dasun nga semana bilang kabahin sang preventive measures nga ginapatigayon sang tagdumalahan sang nasambit nga eskwelahan batok sa Coronavirus
Sa interview sang Bombo Radyo kay Dr. Jose Barcelona, assistant principal sang Huasiong College of Iloilo iya ginpahayag nga mas pasangkaron pa nila ang ginaptigayon nila nga preventive measures paagi sa pagpahamtang sang thermal scanner sa gate sang ila eskwelahan agud mahibaluan kun may simtomas sila sa nasambit nga virus.
Suno kay Barcelona, nagpatigayon na sila sang board meeting kaupod ang mga Board of Trustees sang eskwelahan agud istoryahan ang iban pa nga mga lihok nga mahimo nila patigayunon agud malikawan nga magsulod ang Coronavirus kag maapektuhan ang ila mga estudyante kag staffs sang ila eskwelahan.
Santo sa pahayag ni Barcelona may yara na sang 25 ka mga estudyante kag duha mga ka mga manunudlo nagikan sa ila eskwelahan nga kumpirmado nga nagpadulong sa iban nga pungsod sa diin may kaso na sang Coronavirus kaangay sang China, Hong kong kag Singapore.
Dugang sang natungdan, ginabisuhan na nila ang mga nakapadulong na sa China nga indi anay magbalik sa Pilipinas kag sa mga nakabalik naman ginpanugyanan na nila ini nga magpaidalom sa ‘self quarantine’ sa sulod sang 15 ka adlaw.
Sa pihak sini nagpaathag si Barcelona nga wala pa sang estudyante ukon manunudlo sa ila eskwelahan nga nagpositibo sa Novel Coronavirus.
