ILOILO CITY – Nagapadayon subong nga adlaw ang strike sang mga nurses sa duha ka mga ospital sa New York City.
Ini matapos nga napaslawan ang gobyerno sang New York nga maresolba ang indi pag-intindihanay sa tunga sang nurses kag ospital.
Suno kay Bombo International Correspondent Ludovico Baqueriza III, nagalaum sila nga masolbar na ini sa ikaduha nga adlaw bangud nga maapektuhan na ang pagresponde sa medical emergencies bangud sa kakulangan sang mga nurses.
Mangin sila nga mga nurses ang indi man makabaton sang sweldo kun padayon sila nga mag-strike kag indi magsulod sa trabaho apisar nga nagapadayon ang pagbaton nila sang insurance tubtob sa katapusan sang bulan.
Sa subong, nagdangat na sa masobra sa 7, 000 ka mga nurses ang nag-upod sa ginakabig pinakadako nga hublag protesta sa Estados Unidos.
Nahibaluan nga nagpatigayon sang strike ang miyembro sang New York State Nurses Association sa atubang sang Mount Sinai Hospital sa Manhattan kag Montefiore Medical Center sa Bronx bangud sa isyu sa ginapahayag indi patas nga sweldo sa ila.
Magluwas sa ginapangayo nga pagpsaka sang sweldo, indi na maka-agwanta ang mga nurses bangud sang manubo nga nurses to patient ratio gani, naga-demand sila nga dugangan ang gina-hire nga healthcare worker.
Ginpahayag sang ospital nga nag-offer sila sang 19.1% compounded wage increase sa mga nurses samtang ang Montefiore Medical Center ang nagpasalig nga magabukas sang masobra sa 170 nga bag-o nga nursing positions.
