ILOILO CITY- Nagdaug ang I-Bike program sang Iloilo City Government sa Galing Pook Award 2022 nga nagakilala sang pinakamaayo kaag pinaka-innovative nga programa sa local governance nga nagasentro sa promosyon sang partisipasyon sang pumuluyo kag positibo nga resulta.
Ang I-Bike Program sang syudad ang nagaduso sang kultura sang regular nga pagbisekleta kag promosyon sang road sharing kag safe nga mobility practices.
Sa interview sang Bombo Radyo kay Iloilo City Mayor Jerry Trenas, iya ginpahayag nga ang nasambit nga award ang kumpirmasyon nga ang maayo nga panghimanwa kag liderato ang magabunga sang madamo nga benepisyo sa mga pumuluyo.
Suno kay Trenas, dako man ang papel nga gintungdan sang mga city government officials kag mga empleyado para sa kadalag-an sang programa.
Ginpabugal man sang alkalde nga humalin sang ginpatigayon ang 2021 Bike Festival sa syudad, mas nagdoble ang numero sang mga pumuluyo nga nagagamit sang bisekleta.
Nahibaluan nga halos 200 ka local government units ang nagpaindis-indis para sa Galing Pook Award,apang 18 lang ang napilian nga finalists tubtob nga nagpili sang Top 10 kun sa diin nalakip ang Iloilo City.
Mismo si Presidente Ferdinand Marcos ang naghatag sang award nga personal nga ginbaton ni Mayor Trenas sa seremonya nga ginpatigayon sa Malacanang.
Ini na ang ikatatlo nga inisyatibo sang syudad nga nagdaug sang Galing Pook Award kun sa diin ang una amo ang Iloilo River Rehabilitation Project kag ang Iloilo Dinagyang Festival.
