ILOILO CITY- Ginplastar sang isa ka Bombo Abugado nga wala sang gahum ang national government nga kontrolon ang isa ka local government unit.
Ini may kaangtanan sa ginpagwa ni Cebu Governor Gwendolyn Garcia nga executive order angot sa optional nga pagsuksok sang face mask sa public open spaces, ang tikang nga nagalapas sa resolution sang National Inter-Agency Task Force (NIATF).
Sa interview sang Bombo Radyo kay Atty. Joenar Pueblo, law professor sa University of San Agustin- College of Law, iya ginpahayag nga sa idalom sang Republic Act No. 7160 ukon ang Local Government Code of 1991, may yara sang local autonomy ang mga local government units (LGU).
Suno kay Pueblo, apisar may yara sang supervisory power ang IATF sa mga LGUs, apang indi sini makontrol ang mga tikang sang mga local chief executives.
Apang suno sa abogado, nagadepende sa gihapon sa IATF kun magpasaka ini sang kaso batok kay Garcia.
Sa bahin sang Department of Interior and Local Government (DILG) bilang supervising agency, mahimo man ini mag-ubra sang legal nga tikang batok sa nasambit nga executive order sang LGU sang probinsya sang Cebu.
