Doble ukon triple sa pwersa sang Iloilo City Police Office (ICPO) ang lauman nga magapasiguro sa seguridad sang mga magatambong sa Dinagyang Festival sa syudad sang Iloilo subong nga Enero.
Sa interview sang Bombo Radyo kay Pol. Lt. Col. Rene Obregon, Jr., chief sang City Operations and Management Unit sang talatapan, iya ginpahayag nga identified na subong ang task group kag task units lakip na ang augmentation halin sa regional command.
May sunod pa nga conference ang security group kaupod sa Iloilo Festivals Foundation Incorporated (IFFI) agud nga mahitso ang tanan nga concerns kag detalye sang mga aktibidad agud malikop man tanan sang security group.
Suno kay Obregon, bangud may yara sang magaabot nga foreign dignitaries sa Iloilo Dinagyang Festival 2023 tribes dance competition, lauman man nga may yara sang mas hugot nga pagbantay kaangay sang standby protocol nga may specific number sang patrol units.
Sa latest announcement sang Iloilo City Government, may 13 ka diplomats nga magaabot sa Iloilo nga [initially] nagikan sa Republic of Panama, Indonesia, Bangladesh, Thailand, Nigeria, Norway, Romania, Japan, Poland, Hungary, Sri Lanka, kag Estados Unidos sang Amerika.
Kumpirmado naman ang pagtambong ni First Lady Atty. Liza Araneta-Marcos.
Magluwas sa pwersa sang kapulisan, may dugang man nga suporta halin sa force multipliers suno kay Obregon.
Sa masunod nga semana, posible nga may yara na sang checkpoint sa border controls bilang kabahin sang pagpanghanda sang security group.
Naka-record ang Department of Tourism sang [more or less] 100,000 visitors sang nagligad nga January 2020 ukon pre-pandemic nga Dinagyang Festival gani ginalauman sang organizers nga amo man sini kadamo — ukon masobra pa — ang magatambong subong nga edisyon sang Dinagyang.
