Nagpangabay ang Iloilo City Traffic and Transportation Management Office ukon ICTTMO sa mga motorista nga respetuhon ang 10-meter clearance sa corner sang General Luna kag Muelle Loney St. kag likawan ang pag-park sa sini nga mga lugar.
Sa interview sang Bombo Radyo kay ICTTMO Head Ret. Col. Uldarico Garbanzos, iya ginpahayag nga may mga traffic signage sang una nga indi husto ang placement sa pila ka lugar rason sang miscommunication sa mga motorista.
Apang, gin-athag sini nga ila na ato nakaayo kag nabutang naman sang ICTTMO kung sa diin dapat ibutang ang mga traffic signage.
Ginklaro man niya nga allowed ang magparking sa side sang Provincial Capitol nga malapit sa pader sang Capitol, bangud gintalana ini para sa mga kliyente kag empleyado.
Apang, wala ginapahanugutan ang pag-park sa bahin sang esplanade agud mapabilin nga wala sang obstruction sa lugar amo man nga padayon ini sa gihapon nga makadtoan sang publiko.
Ginpabutyag man niya nga importante ang husto nga placement sang traffic signage agud wala sang may masugata nga problema ang mga motorista, ilabi na sa mga lugar nga may no-parking restrictions.
