𝗜𝗟𝗢𝗜𝗟𝗢 𝗖𝗜𝗧𝗬 – Nagapanawagan ang Iloilo City Council sa Metro Pacific Water (MPW) nga tungdan ang nasaad sa ila joint venture agreement sang Metro Iloilo Water District (MIWD) nga maghatag sang bastante nga supply sang tubig sa syudad.
Nahibaluan nga ginpirmahan ang joint venture agreement sa tunga sang MPW kag MIWD sang Nobyembre 2018, apang gin-umpisahan ang operasyon sang Hulyo 2019 sa diin katuyuan nila nga mapasanyog ang water kag sanitation services para sa Ilonggo community.
Sa interview sang Bombo Radyo kay Iloilo City Councilor Romel Duron, chairman sang Committee on Public Utilities sa konseho, iya ginpahayag nga tuman kakulang ang gina-supply nga tubig sang MPW.
Suno kay Duron, ginrason na sang MPW nga naatrasar ang ila pipe laying bangud sa pandemya.
Bangud man sa mga daan nga tubo sang tubig, nagaresulta ini sa Non-Revenue Water ukon commercial losses.
Apang indi ini dapat suno sa konsehal paghimuon nga rason agud madepensahan ang ila kapaslawan nga matungdan ang ila katungdanan nga mag-supply sang bastante nga tubig sa syudad.
Indi man bastante suno sa natungdan ang ginahimo nga pag-supply sang tubig gamit ang truck.
Nagakadapat man suno kay Duron nga magpangita ang MPW sang iban pa nga sources sang tubig kag indi maghulat sa Jalaur river nga sa subong indi pa operational.
Sa katapusan sang tuig 2024, ginalauman nga magakinahanglan ang syudad sang 47 million liters sang tubig kada adlaw.
