ILOILO CITY – Nagpaidalom sa voluntary self-quarantine si Iloilo City Councilor Alan Zaldivar kag ang iya bilog nga pamilya matapos nga maka close contact ang iya utod nga nagikan sa Australia nga may 199 nga kaso sang COVID-19.
Sa interview sang Bombo Radyo kay Zaldivar, iya ginpahayag nga pag abot sang iya nga utod nagikan sa airport gilayon nila ini nga gin isolate kag gindisinfect lakip man ang iya mga bagahe kag ang salakyan nga gingamit niya.
Suno kay Zaldivar, wala man sila naga upod sa isa ka lugar sang iya nga utod apisar nga yara lang sila sa sulod sang isa ka balay kag ginsunod gid nila ang social distancing.
Dugang sang natungdan, nakonsulta na siya kay City Health Office Incharge Dra. Annabelle Tang kag kay Dr. Roland Jay Fortuna nga focal person for Coronavirus sa syudad para sa mga nagakadapat nila nga himuon.
Sa subong wala nakitaan sang sintomas sang COVID-19 ang iya nga utod lakip man ang iya nga bana apang padayon nila ini nga gina monitor.
Ginpahayag ni Zaldivar nga luyag niya nga ipakita sa pumuluyo nga siya mismo ang nagasunod sa ginpatuman nga pagsulundan sa City Health Office.
Padayon naman ang panawagan sang natungdan as publiko nga mag-isa kag mag kooperar sa mga pagsulundan nga ginpatuman sang Cotiy government agud makalikaw nga matapikan sang nasambit nga balatian.
