Wala ginatolerar sang Iloilo City Government ang natabo nga insidente sang pagpanakit nga ginhimo ni Punong Barangay Gemma Calzado sa SK kagawad sini nga si Lorence Galvez sang Barangay Kasing-Kasing, Molo, Iloilo City.
Ini matapos ginlampusan sang punta sang silhig nga may stainless nga materyales sang Punong Barangay ang SK Kagawad nga nagresulta sa pagka-gisi sang agtang sini.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga ginmandu-an na sang alkalde ang Iloilo City Police Office nga imbestigaran sang husto kag patas ang nasambit nga insidente.
Nahibaluan man nga nagpakigkita na si Mayor Treñas kay Iloilo City Police Office Officer-in-Charge Police Colonel Wilbert Parilla kahapon ng adlaw agud masiguro ang madali kag patas nga imbestigasyon sa natabo.
Luyag sang Local Government nga maestablisar ang kamatuoran kag masiguro nga mahatagan sang hustisya ang biktima.
Gindugang pa sini nga ila tinguhaan nga mapasabat ang may responsibilidad sa insidente.
Nagpahanumdom man ini sa mga opisyales sa syudad nga ipabilin ang respeto sa isa kag isa kag himuon ang ila mga obligasyon sa komunidad nga may disiplina kag integridad.
