Prayoridad sang national government ang syudad sang Iloilo sa alokasyon sang COVID-19 vaccines bangud sang nagakatabo nga surge sang COVID-19.
Suno kay Presidential Spokesperson Atty. Harry Roque, nagadepende ang allocation sang bakuna sa populasyon kag ‘incidence’ sang COVID-19 sa isa ka lugar.
Gintumod pa ni Roque nga nadala ang Iloilo City sa NCR Plus 8, Plus 10.
Ang NCR Plus 8 amo ang Metro Manila, Cavite, Laguna, Pampanga, Batangas, Rizal, Bulacan, Metro Davao, kag Metro Cebu samtang ang NCR Plus 10 amo naman ang 10 ka iban pa nga syudad nga nalakip sa unahon sa vaccine deployment.
Ini man ang rason suno sa natungdan kun ngaa 50,000 doses gid sang Sinovac vaccines ang iya gindala sa syudad kahapon, Hulyo 1.
Lakip man sa dala sang spokesperson amo ang 27 ka mechanical ventilators, 31 ka Bilevel Positive Airway Pressure (BPAP), lima ka High Flow Nasal Cannulas, kag 12,000 ka personal protective equipment (PPE) gears.
Bangud may yara sang cold storage capacity ang syudad, lauman man nga maabot ang suplay halin sa Moderna kag Pfizer.
Sang Hunyo 27 lang sang gab-i sang nag-abot sa Pilipinas ang labing-una nga batch sang Moderna vaccines apang ipanagtag man ini sa urban centers nga may cold storage capacity suno kay Roque.
May 40 million man nga bakuna nga gin-order halin sa Pfizer kag makaambit man diri ang syudad.
Una naman nga nagpabutyag si Mayor Jerry Treñas sang kalain sang buot sa atubang ni Roque bangud Sinovac vaccines ang nagaabot sa syudad, indi kaangay sa Metro Manila kun sa diin ginapanagtag ang Moderna brand.
Sunod naman nga gin-athag ni Roque nga indi lang Iloilo ang ginakulang sang bakuna kundi bilog nga Pilipinas.
