ILOILO – Ginpaidalom na sa code white ukon naka hightened alert na ang bilog nga syudad sang Iloilo para sa close monitoring sang Coronavirus kasunod sang sunod-sunod nga mga aktibidad sa diin gina ekspektar ang pagdugok sang mga tawo ilabi na sang mga dumuluong.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga nakigsapol na siya sa Disaster Cluster agud istoryahan ang mga lihok nga patigayunon agud ma monitor ang posible pagsulod sang nasambit nga virus sa syudad kag probinsya sang Iloilo.
Suno kay Mamon, base sa record sang Provincial Health Office wala pa sang kaso sang Coronavirus nga nakasulod sa Iloilo kag nagpatigayon naman sila sang educational campaign natuhoy sa nasambit nga sakit.
Padayon man ang paghatag sang Department of Health sang advisory natuhoy sa virus para sa ihibalo sang mga pumuluyo.
Nakig angot naman sila sa Civil Aviation Authority of the Philippines (CAAP) agud tsekyaron ang mga pasahero kag mga dumuluong nga nagsulod sa syudad ilabi na ang mga nagikan sa mga pungsod nga nagpositibo sa kaso sang nasambit nga sakit.
Dugang sang natungdan, gindirektahan naman nila ang mga hospital nga imonitor ang mga pasyente kag makig angot sa Provincial Health Office para sa closed monitoring sang virus.
Nagpanugyan naman so Mamon sa publiko nga mag stock na sang N95 mask nga mahimo mangin proteksyon sa virus.
