ILOILO CITY- Ginrekomendar sang Provincial Agriculture’s Office ang pagpasanyog pa sang produksyon sang bombay sa probinsiya sang Iloilo agud mangin self-sufficient ini.
Sa interview sang Bombo Radyo kay Dr. Ildefonso Toledo,head sang Iloilo Provincial Agriculture’s Office, iya ginpahayag nga base sa per capita consumption,ang isa ka Ilonggo ang nagakonsumo sang 6.44 kilos sang bombay kada tuig gani kinahanglan nga maka-produce ang Iloilo sang 6,000 metric tons ukon 6 million kilos sang bombay kada tuig.
Apang suno kay Toledo, sa subong, yara lang sa 5,000 metric tons ang masarangan nga ma-produce sang probinsya.
Paathag niya, ini bangud nga tuman ka nubo ang average production per hectare sang onion nga yara lang sa duha ka metric tons kada ektarya nga tuman ka layo sa national average nga 11 metric tons per hectare.
Nahibaluan nga sa Iloilo, ang banwa sang Miagao nga ginakabig nga onion capital sang Western Visayas ang pinakadako nga producer sang bombay apang may onion farms man sa Igbaras, Tubungan, Oton, Tigbauan, San Joaquin,Guimbal, Alimodian,San Miguel, kag San Joaquin.
Dugang ni Toledo, pananglitan magdako ang produksyon sa Iloilo, dako ang mabulig sini agud mapanubo ang presyo sang bombay.
