Nadugangan sang 205 ka kaso sang dengue ang probinsya sang Iloilo sa sulod lang sang isa ka semana.
Sa data sang Iloilo Provincial Health Office (PHO), yari ang nagdugang nga mga kaso: walo ang naga-edad below 1 year old, 77 ang nagaedad 1-10 anyos, 63 ang nagaedad 11-20 anyos, 33 ang nagaedad 21-30 anyos, 13 ang nagaedad 31-40 anyos, kag 11 ang nagaedad 41 anyos pasaka.
Sa kabug-usan, may yara na sang 1,417 ka kaso sang dengue sa probinsya halin sang Enero 1-Hulyo 23 subong nga tuig kag 13 ang mga napatay.
Sang nagligad nga tuig, sa amo man nga period, 269 lang ka dengue cases ang na-record kag isa ang patay.
Buot silingon suno sa PHO, 426.8% gid ang ginsaka sang kaso subong nga tuig.
May pinakamataas nga numero sang kaso sa probinsya ang banwa sang San Joaquin nga may 152; Oton nga may 140; Guimbal nga may 114; Tubungan nga may 111; kag Banate nga may 88 ka kaso.
Sa interview sang Bombo Radyo kay Iloilo Provincial Health Officer Dr. Maria Socorro Quinon, iya ginpahayag nga mas maayo gid kun magpakonsulta gilayon sa doktor kun makit-an ang mga sintomas sang dengue kaangay sang dehydration, hilanat, rashes, kag pagpalanuka. ##
