Magahingyo ang Sangguniang Panlalawigan sa Iloilo City Council nga hatagan sang tyansa ang provincial jeepneys nga makasulod sa syudad sang Iloilo.
Sa interview sang Bombo Radyo kay Board Member Domingo Oso Jr., majority floor leader kag vice-chairman sang Committee on Transportation sa Iloilo Provincial Board, iya ginpahayag nga istoryahan pa niya kaupod si committee on transportation chairman Provincial Board member Ramon Sullano kun ano nga partikular nga oras ang hingyuon sa syudad.
Napalab-ot na ini nga concern sa Provincial Planning and Development Office (PPDO) kag nagaplano man suno kay Oso nga magpatigayon sang consultative meeting agud mahibaluan man sang syudad ang hibubun-ot sang transport groups kag commuters nagikan sa probinsya.
Antes sini, may yara na sang resolution nga napasar ang Sangguniang Panlalawigan sang Marso sini nga tuig nga nagapanawagan ang isuspinder ang Local Public Transport Route Plan (LPTRP).
Ginhimo ang resolution sang Marso 15, kag sa impormasyon sang natungdan, may yara anay sang ‘gentleman’s agreement’ ukon indi pormal nga pagsugtanay nga indi anay pag-ipatuman ang LPTRP apang pag-abot sang Hunyo 12, gin-implementar ini gihapon sa syudad.
Nagpasalig si Oso nga iduso ini kag magahulag gid ang provincial board agud nga mabuligan ang commuters ilabi na samtang nagahilapit ang pag-balik sang face-to-face classes kun san-o ginalauman nga magdamo liwat ang mga estudyante nga magapakadto-pabalik sa syudad.
