ILOILO – Naka-lockdown ang Iloilo Provincial Capitol umpisa subong nga adlaw, Setyembre 7.
Sa exclusive interview sang Bombo Radyo kay Iloilo Governor Arthur Defensor Jr., iya ginpahayag nga ang nasambit nga tikang ang bangud man sa pagpatigayon sang disinfection bangud sa pagpositibo sa COVID-19 sa pila ka mga personnel.
Suno kay Defensor, magalawig ang lockdown tubtub bwas, Setyembre 8.
Ini nga tikang suno sa gobernador ang naisipan niya nga solusyon agud mangin mahapos ang pagpatigayon sang contact tracing.
May skeleton staff naman nga naka-duty sa Operations Center kag Provincial Disaster Risk Reduction and Management Office (PDRRMO) bangud sa yellow rainfall advisory.
Magabalik naman sa trabaho ang mga personnel sang Iloilo Provincial Capitol sa Huwebes, Setyembre 9.
Nagpangayo man sang paghangop ang gobernador sa pumuluyo nga naapektuhan ang transakyon bangud sa lockdown.
