ILOILO CITY- Nagabuylog ang Iloilo Provincial Government pinaagi sa Provincial Health Office sa selebrasyon sang Nutrition Month subong nga Hulyo.
Ang tema sa subong nga tuig amo ang “Healthy Diet Gawing Affordable For All.”
Santo sa World Health Organization, ang healthy diet amo ang pagkaon sang prutas, utan, legumes, mani kag whole grains kag iban pa nga mga pagkaon nga may yara sang sustansya.
Sa interview sang Bombo Radyo kay Dr. Wendel Marcelo, Provincial Health Officer 1, iya ginpahayag nga ang pagpabilin sang good health sa tawo ang nagakinahanglan sang kooperasyon sang tanan nga sektor sang sosyudad.
Tinutuyo man sang tema amo nga i-promote ang food and nutrition security samtang ginapabilin sa manubo nga presyo ang tanan nga mga pagkaon.
Pinaagi sa pagbinuligay sang mga stakeholders suno sa iya, amat-amat nga mahilway sa kagutom ang mga Filipinos.
Apang agud nga mangin affordable ang mga utan, prutas kag iban pa nga source of protein, kinahanglan nga may yara sang tikang nga ginahimo ang gobyerno kag suporta halin sa private sector.
Sa bahin sang Provincial Health Office, magahiwat sang selebrasyon ang kapitolyo sa Hulyo 10 nga may tema “Katutubo sa Nutrisyon Kayo ang Bida Ngayon.”
Magasentro ang programa sa mga tumandok sa diin may yara sang cooking contest nga ibida nila ang ila tagsa ka mga indigenous recipes.
Magluwas sina, may yara man sang patigayunon nga labing una nga barangay nutrition scholars convention sa diin pagaistoryahan ang mga nutrition programs sa barangay.
