ILOILO CITY – Ginaduso ni Iloilo Vice Governor Christine Garin sa Sangguniang Panlalawigan nga malakip sa makabaton sang Social Amelioration Program ang mga barangay officials.
Lakip diri ang mga Punong Barangay, barangay kagawad, secretary kag treasurer.
Sa interview sang Bombo Radyo kay Garin, iya ginpahayag nga base sa iya pagpangusisa sa probinsya sang Iloilo , gamay ang ginabaton nga honorarium sang mga barangay officials nga naka depende sa internal revenue allotment sang barangay.
Dugang sang natungdan, kun mahimo kun tani nga madala sa Social Amelioration ang mga barangay officials bangud sa ila tagsa ka mga barangay sila ang ginakabig nga mga frontliners kag amo ang naga uyat sang tanan nga problema subong nga tion sang krisis sa Covid-19.
Luyag sang bise gobernador nga magdihon sang resolusyon ang Sanguniang Panlalawigan may kaangtanan diri kag ipasa sa Kongreso, Office the President, Inter-Agency Task Force kag sa Department of Social Welfare and Development agud makita nila ang problema sang mga barangay officials sa kada barangay nga amo man ang mga nagapanguna sa away batok sa Covid-19.
