ILOILO CITY- Napaslawan man sang madamo nga beses, wala gid nagbuya ang isa ka 42-anyos nga tour guide kag vlogger sa Concepcion, Iloilo nga sa pila ka adlaw, maagom gid niya ang kadalag-an nga ginahandom kag mangin isa ka lisensyado nga manunudlo.
Ini amo si Renante Morano “Beboy” Villasis, produkto sang Northern Iloilo State University (anay Northern Iloilo Polytechnic College) nga nakapasar sa Licensure Examinations for Teachers (LET) sa ika-15 sini nga kahigayunan nga pagkuha sang pasinawan.
Sa interview sang Bombo Radyo kay Villasis, iya ginpahayag nga 2014 ini naggradwar sa kurso nga Bachelor in Secondary Education, Major in Filipino.
Matapos ini naggraduate, gilayon ini nga nagpreparar para sa Board Exam apang sa malain nga palad, napaslawan ini nga makapasar.
Sa pihak sini, nagpadayon si Villasis sa pagkuha sang pasinawan apang pila ka beses man ini nga wala nakapasar tubtob nga naglab-ot na sa 14 ka mga Licensure Examination for Teachers ang iya ginkuha apang kaangay nga gindingutan ini sang maayo nga kapalaran.
Sa sulod sang malawig nga tion nga iya naagom ang tuman ka damo nga kapaslawan kag pagpanghikay sa iya sang iban, ang tinaga sang iloy niya nga nagtaliwan na sang nagligad lang nga mga tinuig amo ang naghatag sa iya sang kabakod nga magtindog liwat kag kaisog nga magkuha sang pasinawan.
Sang damlag lang, halos hindi matakos ang iya kalipay sang nakit-an na gid man niya ang iya pangalan bilang isa sa mga nakapasar sa licensure exam.
Panugyan niya sa mga tawo nga pila ka beses na nga nakaagom sang kapaslawan, indi gid madulaan sang paglaom bangud samtang nagakabuhi, may kahigayunan nga matuman gid ang handom.
