ILOILO CITY- Ginmando na sang Israel ang evacuation sa isa ka hospital sa southern Gaza city sang Rafah apisar nga ini nga pasilidad ang nahamtang sa area kun sa diin ginapapanago sang Israel ang mga sibilyan.
Apang suno kay Sohaib al-Hams, director sang Kuwaiti Specialist Hospital, indi nila luyag i-abandonar ang ospital kag padayunon ang pagbaton sang mga pasyente sa pihak sang wala untat nga pagpaulan sang Israeli airstrikes.
Wala naman sang paathag ang Israeli army kun ngaa ginmando ang evacuation sa amo nga ospital.
Isa sa ginaproblema subong sa bilog nga Gaza amo ang shortage sang potable water kag mahimo ini nga magresulta sa lapnagon nga mga balatian dala sang mahigko nga tubig.
Magluwas sa problema sa tubig, nagakaubos naman ang bulong sa mga pilason kag nagamasakit.
Samtang, subong nga adlaw, natalana nga magbisita sa Israel si United States President Joe Biden base man sa pahayag ni Secretary of State Antony Blinken.
Suno naman kay Bombo Jerwin Marmolejo, international correspondent sa Jerusalem, Israel, ginastriktuhan sila nga makagwa bangud ginapatihan nga may mga Hamas nga naka-sulod sa bisan diin nga bahin sang Israel kag nagalibot lamang kag posible mag-atake sa mga sibilyan.
