Nag-file si Senator Imee Marcos sang resolution agud makapatigayon sang inquiry sa Senado sa gina-alegar nga pagbayad sang P100 agud mapapirma ang mga tawo sa petition nga amyendahan ang 1987 Constitution paagi sa people’s initiative.
Una na nga ginpahayag sang senadora nga ginabanta P20 million ang ginatanyag kada distrito agud baklon ang pirma sang rehsitrado nga mga botante nga amo ang kinahanglan sa pagduso sang Charter change (Cha-cha).
Sa Senate Resolution No. 902, ginsiling ni Senator Marcos nga indi nga mga lihok ang makabig “unconscionable acts of corruption” nga dapat untaton.
Ini nga tikang sang presidential sister ang kasunod man sang claim ni Albay 1st District Representative Edcel Lagman nga nagpaguwa ang Ako Bicol party-list sang pondo sa tuyo nga bayaran ang mga botante para magpirma sa petition.
Sunod man nga ginpanginwala ni anay Ako Bicol party-list Rep. Alfredo Garbin Jr. ang amo nga akusasyon.
Nahibaluan nga sa idalom sang 1987 Constitution, may tatlo ka paagi para sa Charter change: una, ang constitutional convention; ikaduha amo ang pagtingob sang Senado kag Kamara para sa constituent assembly; kag ang ikatatllo amo ang people’s initiative.
Sa idalom sang people’s initiative ukon “power of the people”, mahatagan sang gahum ang publiko nga magduso sang amendments sa Constitution paagi sa paghimo sang petition nga pirmado sang at least 12 percent sang rehistrado nga mga botante.
Sa Kamara, una na nga ginpahayag ni Speaker Martin Romualdez nga tutukan na sang mga mamalidha ang charter change subong nga 2024.
Matandaan nga gin-aprubahan man sang lower chamber ang resolusyon sang Marso 2023 para nga magtingob na ang Senado kag Kamara para sa constitutional convention agud madiskusyunan ang Cha-cha apang mahina kag indi makalusot ang kaangay nga resolusyon sa Senado.#
