Imee Marcos, nanginwala nga siya ang sa likod sang palpak nga kudeta sa Senado

Ginpanginwala ni Senator Imee Marcos nga siya ang yara sa likod sang tuyo nga pagkakas kay Senate President Vicente “Tito” Sotto III sa posisyon.

Sa iya nga official statement, ginsiling sang presidential sister nga bisan ang minority bloc ang makapamatuod nga isa siya sa mga katapusan nga nakahibalo sa tuyo nga kudeta.

Ginpanindugan man sang senadora nga ang gintuyo nga kudeta ang wala naangot sa pagpahalin sa iya bilang chairperson sang Senate committee on foreign relations.

Sa pagkamatuod suno sa iya, sang ginhatag sa iya ang amo nga komitiba bisan nga indi man siya katapo sang majority bloc, tuman gid ang iya pagpasalamat sa Senate President.

“The leadership needs to know that the buzz about changing the SP was loud because senators were worried. There was a growing fear that our institution was being shaken by cases and controversies for which the Senate should not be held accountable,” suno pa sa senadora.

Matandaan nga si Sotto mismo ang nagsambit sang pangalan ni Imee nga amo ang nagpanguna sa tuyo nga kudeta, apang napaslawan bangud kulang sila sa numero sa minority.

Matandaan nga una na nagpaathag ang Senate leaders nga ginkakas si Marcos bilang chairperson sang Committee on Foreign Relations bangud nagkasugot ang majority bloc paagi sa caucus nga ini nga major committee ang dapat nga pamunuan sang senador nga halin man sa majority bloc.

Antes sini, may 15 ka mga senador nga nagpirma sang ginaproponer nga resolusyon nga nagapakamalaot sang mga pahayag sang Chinese Embassy batok sa Filipino officials.

Wala nagpirma si Imee sa amo nga resolusyon, apang nagduso siya sang iya kaugalingon nga resolusyon nga nagapanawagan sa mga opisyal sang gobyerno nga maghagan-hagan kag mangin propesyunal kun may mga statement kaangot sa isyu nga may kaangtanan sa iban nga pungsod.#