Ginsaway ni Senator-Judge Erwin Tulfo ang pila sini ka kaupdanan sa Senate impeachment court matapos nakit-an nga ginagamit ang oras sang trial para sa personal nga mga isyu.
Sa pagsugod sang ikapito nga adlaw sang impeachment trial, ginpahayag ni Tulfo nga ang Senate Impeachment Court gintukod agud lamang hibaluon kon may sala ukon wala si Vice President Sara Duterte sa mga alegasyon nga ginapangatubang sini.
Suno sa senador, sa nagligad nga mga adlaw, may pila siya ka kaupdanan nga senador ang nagagamit sang tion sang impeachment trial para depensahan ang ila kaugalingon sa personal nga mga kaso kag isyu, bisan wala ini sang kaangtanan sa trial.
Wala man niya ginhingadlan ang mga senador nga iya ginapatungdan sa iya pahayag.
“If you want to explain your sentiments, you can do that outside the time of the impeachment court. You can have press conferences. The Senate media is there. You can call them anytime they are in the Senate briefing room, press briefing room, and you can also explain your side through Facebook or YouTube,” suno sa senador.
Antes sang pahayag ni Tulfo, nag-manifest si Senator-Judge Robin Padilla sa impeachment court agud ipabutyag nga nakasumiter na siya sang iya counter-affidavit sa Office of the Ombudsman batok sa kaso nga obstruction of justice nga ginpasaka kontra sa iya.
Nagpanawagan naman si Tulfo kay Senate Impeachment Court Presiding Officer Francis “Chiz” Escudero kag Senate President Sherwin “Win” Gatchalian nga indi na pagpahanugutan ang mga pahayag nga wala sang kaangtanan sa impeachment trial.
Suno sa iya, kun ang istorya indi man parte sa depensa ukon prosekusyon ni Vice President Duterte, mas maayo nga indi na ini pag-istoryahan sa impeachment court.
Dugang pa ni Tulfo, indi makatarungan para sa bise presidente kun nagakadto ang oras sang trial sa mga personal nga isyu sang iban nga senator-judges.
“Every minute, every hour that we waste away from the defense or from the prosecution of the case of the Vice President, it is injustice to the Vice President,” suno pa sa iya.
Ginpanawagan sini sa iban niya nga kaupdanan nga dal-on na lamang ang ila personal nga mga pahayag sa media ukon sa social media, kag indi na sa impeachment court.
Antes ina nga pahayag ni Senator-Judge Erwin Tulfo, si Senator-Judge Robin Padilla ang nag-manifest kag ginklaro nga nakapasa na siya sang iya nga counter affidavit sa Ombudsman kaangot sa kaso sa iya kasunod sang pagpalagyo ni Senator Robin Padilla.
Indi matuod ang alegasyon suno kay Padilla nga wala siya nagsunod sa mando sang Office of the Ombudsman nga magsumiter sang iya counter-affidavit.
Matandaan nga mismo si Ombudsman Boying Remulla ang nag-anunsyo nga wala nagpasa si Padilla.
Suno naman sa senador, indi siya magpati kun ang International Criminal Court ukon ICC ang nagmandu sa iya apang ginatahod niya ang Office of the Ombudsman, gani nagsumiter gid siya sang iya counter-affidavit.#
