Balantayan 10:00 subong nga aga ang pag-resume sang hearing sang House Committee on Justice kaangot sa impeachment complaints batok kay Vice President Sara Duterte.
Lima ka resource persons ang ginapaangot sa hearing lakip na sanday Ombudsman Jesus Crispin Remulla kag former senator Antonio Trillanes IV.
Suno kay Justice panel chairperson Rep. Gerville Luistro, importante ang lima agud nga mapaathag ang alegasyon sang unexplained wealth kag non-disclosure sa statements of asses, liabilities and net worth ukon SALN ni Duterte nga naga-constitute sang betrayal of public trust.
Ginalauman nga magapatpat si Remulla kag magapresentar sang kopya sang SALN ni Duterte.
Ini matapos nga nabaton sini ang subpoena para sa SALN ni Duterte halin sang 2022 to 2025, 2007 to 2013, kag 2016 to 2022.
Sa pihak nga bahin, magapresentar naman si Trillanes sang dokumento kaangot sa iya alegasyon nga may unexplained wealth ang bise presidente.
Matandaan nga sulit-sulit nga ginaakusaran ni Trillanes si Sara kag si former president Rodrigo Duterte nga may yara sang ginatago nga manggad.
Magakadto man sa impeachment hearing subong nga adlaw ang AMLC agud nga mag-produce sang reports sa possible nga “covert transactions” kag makaduluda nga mga transaksyon sang vice president kag iya bana.
Gindagdagan man sang subpoena ang Securities and Exchange Commission para sa general info sheets kag audited financial statements sang mga negosyo nga gindeklarar nanday Vice President kag iya bana nga si Manases Carpio.
Maga-report man ang Bureau of Internal Revenue kaangot sa income tax returns ni Duterte kag ni Carpio.
Una na nga ginpaathag sang Kamara nga indi trial ang ila ginahimo kundi clarificatory hearing agud matumod kun may probable cause ang impeachment complaints. Kun may yara, ipasaka ini sa Senado nga amo ang may katungdanan para sa impeachment trial.
