ILOILO CITY – Amat-amat na nga nahatag sang Iloilo City Police Office (ICPO) ang mga impormasyon sa Police Regional Office (PRO) 6 may kaangtanan sa kaso sang tatlo ka pulis nga nagmaoy sa sulod sang isa ka disco bar and restaurant sa syudad sang Iloilo.
Sa interview sang Bombo Radyo kay Police Lt. Col. Jonathan Pablito, hepe sang Police Station 1, iya ginpahayag nga ila na nga ginpasa kay ICPO Director Police Col. Martin Defensor Jr. ang mga natipon nga impormasyontuhoy sa natabo nga insidente.
Suno kay Pablito, mismo si Defensor ang nagpasa sang mga impormasyon kay PRO-6 Director Police Brigadier General Rene Pamuspusan.
Ginpahayag ni Pablito nga daku ang mabulig sang kuha sang Closed Circuit Television (CCTV) sa sulod sang disco bar and restaurant agud nga mahibalu-an kun ano gid ang natabo.
Bangud nga wala sang complainant nga nagpasaka sang kaso, kinahanglan suno kay Pablito nga magpangayo sang pahanugot ang ICPO ukon ang PRO-6 sa tagdumalahan agud nga makakuha sang kopya sang CCTV footage.
Samtang, ginatugyan naman sang PRO-6 sa ICPO ang pagkuha sang kopya sang CCTV sa nasambit nga disco bar and restaurant.
Ginpahayag ni Police Lt. Col. Joem Malong, tagpamaba sang PRO-6, wala pa sila sang may nabaton nga kopya sang CCTV footage nga makapabaskog sa kaso batok sa tatlo ka mga pulis.
Nahibalu-an nga santo sa impormasyon, ginhingadlan na ang bug-os nga pangalan sang tatlo ka mga pulis nga sanday Police Chief Master Sergeant Jose Dinggal, Police Senior Master Sergeant Fernil Mark Mallorca kag Police Staff Sergeant Ralph Mabuque.
