Ginbawi na sang Department of Agriculture (DA) ang ban nga ginpatuman sini sa importasyon sang domestic, wild birds, kag poultry products halin sa states sang California kag South Dakota sa Estados Unidos sang Amerika.
Ginpirmahan ni Agriculture Secretary Francisco Tiu Laurel Jr. ang Memorandum Order No. 37 agud pahanugutan liwat ang pagsulod sang wild, domestic birds, lakip ang poultry products kaangay sang meat, hatching eggs, day-old chicks, kag semen para magamit sa artificial insemination halin sa duha ka states.
Ini nga lihok sang Pilipinas ang kasunod sang development sang duha ka states nga wala na naka-report sang bag-o nga outbreak sang avian influenza halin sang Hunyo kag Mayo subong nga tuig.
Enero sang ginpatuman ang importation ban sang Pilipinas sa California kag Nobyembre 2023 naman para sa South Dakota.
Kaangot ini sa anay outbreak sang H5N1 subtype sang Highly Pathogenic Avian Influenza nga amo ang nagpatay sa minilyon ka infected birds kag poultry.
Suno sa DA, mahimo gid ma-infect sang bird flu pati ang mammals lakip ang tawo.
Ginahalungan ang multi-billion poultry sector sa pungsod bangud major contributor ini sa Philippine agriculture nga naga-account sang 18% sa farm output kag makabig gid nga importante para sa food security.
