ILOILO – Nahamtang sa banwa sang Zarraga ang ginakabig pinakamatahum nga evacuation center ukon incident command center sa diin mahimo temporaryo nga makatinir ang mga pumuluyo sa tion nga magtaas ang tubig kag maglain pa gid ang tiyempo.
Sa interview sang Bombo Radyo kay Zarraga Vice Mayor Joefel Marañon Soldevilla, iya ginpahayag nga may yara sang generator set kag iban pa gid nga mga equipment sa lugar, kag ini ang convenient ‘bisan magdugay pa gani ang mga evacuees.’
Ginpahayag sang bise alkalde nga natipon naman kag nahatagan sang instruksyon ang mga punong barangay sa munisipalidad agud ila mamanduan ang mga pumuluyo sang forced evacuation sa tion nga mabaskog na ang daludo sang tubig, ilabi na bangud madamo suno sa natungdan ang flood-prone barangays sa ila banwa.
Dugang pa ni Soldevilla, nakahanda naman ang dump truck kag mga salakyan sang Local Government Unit (LGU) nga mahimo man makabulig sa mga pumuluyo para sa evacuation.
Nahibaluan nga suspendido man ang klase sa Zarraga sa Pre-school tubtob Senior High School sa publiko kag pribado nga eskwelahan.
