ILOILO – Pagatutukan sang bag-o nga commander sang 3rd Infrantry Division ang pagsolbar sang insurhensya sa Region 6 kag Region 7.
Ini ang ginpahayag ni OIC commander Brigadier General Eric Vinoya sa ginpatigayon nga change of command and retirement of honors sa diin pormal niya nga ginbuslan ang nagretiro na nga si Major General Dinoh Dolina.
Si Vinoya ang nakaagi naman nga gin-assign sa 3rd Infantry Division.
Sa interview sang Bombo Radyo kay Vinoya, iya ginpahayag nga padayunon niya ang mga programa nga ginsugudan na ni Dolina ilabi na ang paghawan sang mga lugar nga may yara sang presensya sang rebelde.
Iya ginmentionar ang Panay kag Negros, apang balantayan man suno sa iya ang posible pagbalik sang mga rebelde sa Bohol kag Cebu.
Dugang sang natungdan, bangud may yara na sang natukod nga Regional Task Force To End Local Communist Armed Conflict (ELCAC), may yara man sang ginatukod nga task force sa mga siyudad, probinsya, kag kabanwahanan nga yara sa idalom sang 3rd Infrantry Division Region 6 kag Region 7.
Nagapati si Vinoya nga ang Task Force ELCAC ang solusyon sa lapnagon nga problema sa insurhensya, kag indi ang “military solution”.
Nahibaluan nga sa sini nga task force, ginatumod sang gobyerno ang mga problema sa komunidad nga amo ang rason sang insurhensya.
Nagapanawagan man si Vinoya sa mga Local Government Units (LGU) nga dapat nga magkooperar sa ila pamunuan kag dapat nga ihatag ang mga kinahanglanon sang komunidad nga amo ang “solusyon” agud nga mauntat ang nasambit nga problema.
Target naman sang 3rd Infantry Division nga matapos ang insurgency sa Panay sa Marso sa masunod nga tuig 2020.
Ang problema sa Negros kag ang iban pa nga rehiyon ang ginabanta matapna na bag-o matapos ang tuig.
