ILOILO CITY- Ginmando na ni Iloilo Police Provincial Office Director PCOl Ronaldo Palomo sa San Joaquin Municipal Police Station ang pagpaid-id pa gid sang imbestigasyon angot sa lalaki nga nasapwan nga patay sa Brgy. Quianan sa amo nga banwa.
Ang biktima amo si Jomar Blanco, 39 anyos, taga San Jose City, Nueva Ecija apang nakaistar sa Roxas City,Capiz kag temporaryo nga nagpuyo sa Balantang, Jaro, Iloilo City.
Sa interview sang Bombo Radyo kay PCol Palomo, iya ginpahayag nga wala pa sang natumod nga persons of interest apang base sa imbestigasyon, naggwa nga may tatlo ka mga lalaki nga nagapangita sa biktima sang nagligad nga semana sa Roxas City.
Suno kay Palomo, ini ang isa sa mga anggulo nga dapat tutukan sang San Joaquin Municipal Police Station.
Nahibaluan nga madamo man sang kaso si Blanco kaangay sang paglapas sa Republic Act 10591 ukon “Comprehensive Firearms and Ammunition Regulation Act”; Republic Act 9165 ukon “Comprehensive Dangerous Drugs Act of 2002”; kag Usurpation of Authority matapos nagpakilala ini nga miembro sang Philippine National Police.
Kaangot sini, ginmando naman ni Palomo sa tanan nga municipal police stations ang pagpabaskog sang checkpoints kag pagbantay sa mga borders agud malikawan ang pagluntad sang kaangay nga mga insidente.
