Nag-positibo sa paraffin test ang isa sa tatlo ka persons of interest sa likod sang pagpatay sa isa ka German National sa Barangay Camiri, San Enrique, Iloilo.
Matandaan nga natabo ang insidente sang nagligad nga Hunyo 8 kun sa diin ginsulod mismo sa iya balay kag ginpatay ang biktima nga si Otto Wolfgang Alexander Knorr, 70.
Sunod nga nagtukod ang Iloilo Police Provincial Office (IPPO) sang Special Investigation Task Group agud magtutok sa kaso.
Sa interview sang Bombo Radyo kay IPPO director Pol.Col. Adrian Acollador nga amo man ang supervisor sang nasambit nga task force, iya ginpahayag nga ginahulat pa subong ang resulta sang ballistic examination.
Gamiton ini agud mapapag-on ang ebidensya kag kun may bastante na nga ginauyatan ang IPPO, posible suno kay Acollador nga i-file na ang panumbungon.
Ang tatlo ka persons of interest nga gintumod sang IPPO ang lunsay man may kaangtanan sa negosyo ni Knorr.
Matandaan nga una na nga ginpahayag sang San Enrique Municipal Police Station nga ginalantaw man nga posible may kaangtanan ang krimen sa negosyo ni Knorr nga pautang nga kuwarta.
