AJUY, ILOILO – Padayon ang imbestigasyon sang Iloilo Police Provincial Office (IPPO) sa ginapahayag ‘vote buying’ sa Ajuy, Iloilo.
Ini matapos nga nadakpan sang otoridad ang duha ka Barangay Health Workers (BHWs), barangay tanod kag isa pa ka lalaki bangud sa ‘vote buying’ sa Sitio Pangpang, Barangay Poblacion, Ajuy, Iloilo.
Sa interview sang Bombo Radyo kay Police Major John Van Herson Luspo, hepe sang Ajuy Municipal Police Station, iya ginpahayag nga lakip sa mga nakuha gikan sa mga arestado amo ang sobre nga may unod nga kwarta, sample ballot kag listahan sang mga botante.
Ang mga arestado amo sanday Fe Dorban, 50, Nemia Arellado, 58, lunsay BHW sa Brgy. Poblacion, Solomon Ubay, 52, tanod sa Brgy. Poblacion kag Edwin Yamson, 59 sang nasambit nga lugar.
Mismo ang Intelligence operative sang Iloilo Police Provincial Office (IPPO) suno kay Luspo ang magaserbe nga testigo sa kaso matapos nga makuhaan sang video ang vote buying.
