Nagsulat ang Iran sa Estados Unidos sang Amerika kag ginsilingan ini nga magpahigad kag indi mag-intra samtang nga gina-preparahan subong ang pagtimalos bangud sa airstrike sang Israel sa consulate sang Iran sa Syria kun sa diin 13 ang patay lakip ang high-ranking Iranian military commanders.
Suno kay Mohammad Jamshidi nga amo ang deputy chief of staff sang Iranian president para sa political affairs, ginpadala sini ang sulat sa Washington kag ginpaandaman pa ang Amerika nga indi mahulog sa patibong ni Israeli Prime Minister Benjamin Netanyahu.
Suno kay Jamshidi, nagsabat ang Amerika sa Iran nga indi man pagdalahigon ang American targets.
Nahibaluan nga antes sini, naka-high alert na ang Estados Unidos sang Amerika kag ang Israel bangud sa posible missile kag drones nga ipalupad sang Iran bilang balos.
Nagpahayag naman ang Lebanese group nga Hezbollah nga amo ang pinakagamhanan nga militia sa Middle East nga indi sila magpahilabot apang “handa” man sila sa gyera sa Israel.
Pananglitan magbalos pa gid ang Israel kun mag-atake ang Iran suno sa grupo, posible gid nga matabo ang regional war.
Nahibaluan nga sa Israel, kabahin sang preparasyon sa posible pag-atake sang Iran amo ang pag-suspend sang leave sang mga soldado, pagpatawag sang tanan nga reservists, pag-block sang GPS agud ma-disrupt ang GPS-navigated drones kag missiles, pagpasangkad sang air defenses, kag pagbukas sang shelters sa Tel Aviv.#
(Atta Kenare/AFP)
