ILOILO CITY- Ginapreparar na ang pagpatigayon sang formal investigation may kaangtanan sa ginapahayag nga mga empleyado sang Iloilo City Hall nga nagapautang.
Ini matapos nga nasumiter na sang City Legal Office kay Mayor Jerry Treñas ang resulta sang imbestigasyon angot sa ginaalegar pwersahanay nga pagpautang sa mga job hires kag sa mga empleyado.
Sa resulta, gikan sa apat tubtob anum ka mga opisyal kag empleyado nga ginatudlo nga involved sa pautang, duha sa ila ang nakitaan sang merito kalakip diri ang isa ka executive assistant.
Sa interview sang Bombo Radyo kay Mayor Treñas, iya ginpahayag nga importante nga maimbestigahan ini agud nga mag-agi ini sa due process kag makahimo sang husto nga rekomendasyon.
Sa interview nman sang Bombo Radyo kay Atty Joseph Areño sang City Legal Office, iya ginpahayag nga nga ginrekomenda nila ang paghatag sang appropriate action batok sa nasambit nga executive assistant samtang ang isa ka empleyado ang ginatugyan nila sa Office of the Ombudsman sa rasin nga may yara man ini sang existing nga kaso.
Suno kay Areño, ginbasehan nila sa rekomendasyon ang sworn affidavits sang mga empleyado kag anay empleyado sang City Hall.
