Wala nalakip sa agenda ni President Bongbong Marcos sa iya state visit sa Japan ang isyu sa mga comfort women ukon ang mga babayi nga ginpwersa nga maghatag sang sexual service sa mga soldado sang World War II.
Suno sa Department of Foreign Affairs, na-settle na ang amo nga isyu sang ginpirmahan ang 1956 Reparations Agreement kaupod sa Japan, sang ginhatagan ang Pilipinas sang $550 million ukon P29.942 billion nga balor sang goods kag services.
Apang suno kay Nathaniel Imperial, Foreign Affairs assistant secretary for Asian and Pacific Affairs, indi pagpunggan sang gobyerno sang Pilipinas ang private claims pananglitan may mga biktima nga maghimo sini.
Sandig sa rekord sang Comfort Women Issue and the Asian Women s Fund digital museum, ginapahayag may yara sang 30 comfort stations sa Pilipinas.
Buot silingon sini, may yara sang 30 ka brothels ukon garrisons, converted hospitals, ukon balay mismo sang babayi kun sa diin gin-abusuhan sang Japanese soldiers ang lamharon nga mga kababaihan nga masami naga-edad sang 12-17.
Matandaan nga sang 1993, nagpangayo na sang pasaylo ang Japan sa involvement sang militar sa amo nga brothel system apang nagpamalibad nga akuon ang papel sang gobyerno diri. ##
