ILOILO CITY – Tubig, pagkaon, kag cash ang kinahanglan sang mga tawo nga apektado sang Bagyo Ursula sa Northern Iloilo.
Sa interview sang Bombo Radyo kay Msgr. Meliton Oso sang Jaro Social Action Center, iya ginpahayag nga bangud kontaminado ang mga bubon sa mga lugar sa Quinto distrito, indi pa hilway nga imnon sang mga tawo ang tubig.
Labi man nga kinahanglanon ang donasyon nga cash bangud kalabanan sa mga tawo suno sa natungdan ang may utang na nga pagkaon apang wala pa sang inugbayad.
Ipaanggid sa pagbyahe pa sang mga relief goods, suno kay Msgr. Oso, mas mahapos kun kwarta na lang ang ihatag sa mga tawo sa Balasan, Estancia, kag Carles.
Kaina sang aga, isa ka truck nga relief goods ang gindul-ong sa Norte lakip na ang 15 ka sako nga bugas, tinapay, kag tubig.
Sa subong suno kay Msgr. Oso, gina-validate pa sang sang mga opisyal sang Jaro Social Action Center kun ano gid ang kinahanglanon sa nasambit nga mga banwa agud amo na ini ang mapadala sa sunod nga batch.
Kaangot diri, nagpanawagan si Msgr. Oso sang dugang pa nga donasyon nga mahimo lang idul-ong sa Jaro Social Action Center.
