Jeepney Driver, pilason matapos ginbuno sang anay opisyal sa Brgy. North Baluarte, Molo, Iloilo City

ILOILO CITY–Yara na sa hilway nga kahimtangan ang jeepney driver matapos ginbuno sang anay barangay official sang North Baluarte, Molo, Iloilo City.
Ang biktima ang ginkilala kay Floribert Aquino, 33 anyos samtang ang suspek naman amo si James Asuelo, lunsay pumuluyo sang nasambit nga lugar.
Sa interview sang Bombo Radyo kay Alyas Che-Che, himata sang biktima, iya ginpahayag nga nagbakal sa tyangge si Aquino sang hinali lang nga ginbuno ni Asuelo.
Naka-angkon ang biktima sang duha ka pilas sa kilid tuga sang pagkabuno.
Daan nga hiligut-anon ang ginalantaw nga motibo sa krimen.
Samtang, depensa sa kaugalingon ang rason kun nga-a natabo ang pagpangbuno.
Sa interview sang Bombo Radyo sa suspetsado nga si James Asuelo, iya ginpahayag nga humalin pa sang 2013 nga ginapabati-batian siya ni Aquino.
Dugang pa sang suspetsado, gina-awayan nila ang taytay nga iya ginhimo bangid indi niya luyag maglabay ang biktima.
Gin-awayan man nila ang bahin sa linya sang kuryente bangud suno kay Asuelo indi siya magpasugot nga magtap si Aquino sa iya linya.
Depensa pa ni Asuelo, gintinguhaan man niya nga maglikaw sa biktima apang padayun siya nga ginahingabot.
Nagsumbaganay sila ni Aquino rason nga ginplano niya ang pagkuha sang tapi nga kahoy kag ginlampos sa tuhod sang biktima.
Ginpanginwala man ni Asuelo nga may dala siya nga kutsilyo bangud suno sa iya nakita lang niya nga nakasab-it sa dingding sang isa ka balay ang kutsilyo rason nga nakuha niya ini kag ginbuno sa biktima.