Ginakabig na subong nga suspek kag indi lang person of interest si Jevron Parohinog nga amo ang lone survivor sa natabo nga Estancia Massacre duha ka bulan na ang nakaligad.
Sa interview sang Bombo Radyo kay PCol Noel Aliño, director sang Iloilo Police Provincial Office, iya ginpahayag nga isa na sa mga usual suspects si Parohinog bangud nga nalakip siya sa mga tawo nga may pinakamalapit nga koneksyon sa mga biktima.
Suno kay Aliño, may yara man sila subong sang maayo nga development sa kaso apang nagpamalibad naman nga ituad kun ano ini.
Gindugang naman sang director nga napaidalom na sa test ang tanan nga cellphones sang mga biktima kag mangin ang iya ni Parohinog.
Nagpasalig ang natungdan nga mapasaka na nila ang kaso batok sa mga suspek sa pinakamadali nga panahon apang wala sang may ginhatag nga petsa.
Matandaan nga patay sa amo nga massacre sanday Jan Paul Mark Bosque, Chrysler Floyd Fernandes kag Mark Clarenz Libao nga lunsay mga abyan ni Parohinog.
