Nagpaguwa ang korte sa Manila sang precautionary hold departure order (PHDO) batok kay Senator Jinggoy Estrada kag sa iban pa nga akusado sang plunder bangud sang ginaalegar nga involvement sa flood control corruption.
Ang iban pa nga sakop sini nga order sang Manila Regional Trial Court Branch 52 amo sanday former Department of Public Works and Highways (DPWH) Secretary Manuel Bonoan, former DPWH undersecretaries Maria Catalina Cabral kag Roberto Bernardo, former DPWH regional director Gerard Opulencia, kag former district engineer Henry Alcantara.
Suno sa korte, posible nga mag-guwa ang mga respondent sa Pilipinas agud nga malikawan ang pag-aresto sa ila kag pag-atubang sa kaso.
Paagi sini nga order, may awtoridad na ang Bureau of Immigration and Deportation nga punggan ang nasambit nga mga indibidwal kun maggwa sa pungsod.
Ginklaro ni Justice spokesperson Polo Martinez nga wala ini nagakahulugan nga naresolba na ukon may desisyon na sa pending nga kaso nga plunder sa Department of Justice (DOJ). “Precautionary” ang termino suno kay Martinez nga buot silingon, antes pa man pormal nga mapasaka ang kaso sa korte, may gin-isyu na nga order ang judge bilang antisipasyon pananglitan malagyo ang respondents.
Nagpasa naman sang iya nga counter-affidavit si Bonoan kag naglisensya sa DOJ kaangot sa iya plano nga magkadto anay sa Estados Unidos sang Amerika.
Nahibaluan nga sa idalom sang Republic Act 7080 ukon ang Anti-Plunder Act, ang plunder amo ang krimen nga nakomiter sang public official nga nakatipon sang at least P75 million nga ill-gotten wealth paagi sa kriminal nga mga akto kaangay sang illegal use of funds, pagbaton sang kickbacks, kag paghingalit sang ila nga posisyon.
Gin-akusaran anay si Estrada nga nagpatigayon sang alokasyon sang P355 million para mapondohan ang Bulacan first district kabaylo sang alleged 30-percent cut, apang ginpanginwala ini sang senador.
Nalakip naman si Bonoan sa rekomendasyon sang Independent Commission on Infrastructure (ICI) sa Ombudsman para sa dugang nga imbestigasyon, samtang sanday Alcantara, Bernardo, and Opulencia ang ginakabig na nga state witnesses sa flood control corruption.#
 batok kay Senator Jinggoy Estrada.){kind=link}