ILOILO CITY- Ginatun-an na sang kampo ni Negros Oriental 3rd District Rep. Arnolfo Teves Jr. ang pag-challenge sa korte sang bag-o nga 60 ka adlaw nga suspension nga gindagdag sang House of Representatives batok sa mamalidha.
Suno kay Atty. Ferdinand Topacio, legal counsel ni Teves, apisar nga may gahum ang chamber sa pagpatuman sang suspension kag penalidad batok sa mga mamalidha, apang maathag nga nalapas ang kinamatarung sang iya kliyente partikular na ang paghatag sang due process kag patas nga proteksyon.
Si Teves ang nagapabilin nga yara sa gwa sang pungsod matapos nga gin-angot ini sa assassination ni Negros Oriental Gov. Roel Degamo kag siyam ka iban pa sa balay sang gobernador sa Pamplona, Negros Oriental sang Marso 4.
Nagapanindugan si Teves nga siya kag ang iya pamilya ang wala sang kahilabtanan sa krimen.
Nagpamalibad si Teves nga magbalik sa Pilipinas bangud sa ginapatihan niya nga pagpamahog sa iya kabuhi.
Una na nga ginpasiguro ni President Ferdinand Marcos Jr. kay Teves ang iya seguridad kun pilion niya nga personal nga atubangon ang akusasyon batok sa iya.
Kasunod sang extension sang suspension ni Teves , ginpahanumdom ni House Speaker Martin Romualdez ang mga mamalidha nga magtuman sa pagsulundan sa House kag rules sang mga kumitiba.
