Ginkalipay sang kampo ni Bise Presidente Sara Duterte matapos ipahayag sang Korte Suprema nga wala sang bisa kag unconstitutional ang ika-apat nga impeachment complaint nga ginpasaka batok sa iya.
Sa opisyal nga pahayag sang defense team ni VP Duterte, ginpabutyag nila nga ang desisyon sang Korte Suprema amo ang nagpatib-ong sang ila panguna nga argumento nga ang ika-apat nga reklamo naglapas sa one-year ban nga ginatudlo sang Article XI, Section 3(5) sang 1987 Philippine Constitution.
Suno sa ila, ang unanimous nga desisyon sang mga mahistrado indi lang isa ka kadalag-an para kay Duterte kundi isa man ka pahamtang sang pagrespeto sa rule of law kag isa ka pahibalo batok sa abusado nga paggamit sang proseso sang impeachment.
Ginpasiguro man sang kampo sang Bise Presidente nga handa sila nga atubangon ang bisan ano nga alegasyon sa husto nga panahon kag husto nga forum.
Madumduman nga sang Disyembre 2024, apat ka impeachment complaints ang ginpasaka batok kay Duterte, nga nagalakip sang mga alegasyon nga graft and corruption, betrayal of public trust, kag ang kontrobersyal nga pag-angkon nga may assassination plot batok kay Presidente Ferdinand Marcos Jr., First Lady Liza Araneta-Marcos, kag House Speaker Martin Romualdez.
Ang ika-apat nga reklamo gin-file sang Pebrero 5, 2025, kag gin-endorso sang 215 ka miyembro sang House of Representatives. Bangud sini, ginpadala ini sa Senado para sa impeachment trial.
Apang sang Hunyo 2025, nagdesisyon ang Senado nga ibalik ang complaint sa House of Representatives imbes nga ipadayon ang trial.
Sa katapusan, ginpaguwa sang Korte Suprema ang desisyon nga nagsiling nga unconstitutional ang ika-apat nga impeachment complaint bangud nga ini naglapas sa one-year ban nga ginapatuman sang Konstitusyon.
