Pilason ang 97 ka tawo matapos madiskaril ang train sa syudad sang Toukh, north of Cairo sa Egypt.
Suno sa health ministry sang pungsod, wala sang reported nga napatay kasunod sang insidente kun sa diin nag-awas gid sa riles ang lawas sang train.
Kun basehan naman ang report sang duha ka security sources kag isa ka local media, may mga patay na sa amo nga aksidente apang as of press time, wala pa sang opisyal nga kumpirmasyon.
Masobra 50 ka mga ambulansya ang gindeploy sang Ministry of Health agud maluwas ang tanan nga nagkalapilasan sa amo nga train crash.
Ginpahayag naman sang Egyptian Railways Authority nga ginaimbestigaran pa subong ang rason sang train accident.
Ang train ang naghalin sa Cairo kag padulong na kuntani sa Mansoura.
Suno naman kay health ministry spokesman Khaled Megahed, menor ang pilas nga naangkon sang kalabanan nga mga biktima kag gamay lang ang yara sa kritikal nga kondisyon.
Ini na ang ikatatlo nga major train accident nga natabo sa Egypt sa sulod lang sang isa ka bulan.
Matandaan nga 32 ka tawo ang patay kag 165 ang pilason sang nagligad nga bulan sang nagbungguanay ang duha ka train sa Tahta district sa Upper Egypt governorate sang Sohag.#
