Naglab-ot na sa kapin 200 ka tawo ang napatay bangud sang Ebola outbreak sa Democratic Republic of Congo kag Uganda sa sulod sang una nga bahin sang Hunyo.
Nagsaka naman sa 894 ang kumpirmado nga mga kaso, suno sa Africa Centres for Disease Control and Prevention.
Suno sa mga opisyal, nagsaka sang 38% ang mga kaso kun ikumprara sang nagligad nga semana.
Ginakabig man ini nga pinakamalala nga Ebola outbreak nga na-record sa sini nga bahin sang paglapta sang sakit.
Naglapta naman ini sa 32 ka health zones sa nasidlangan nga bahin sang Congo kag nakalab-ot na sa Uganda kun sa diin 19 ka kaso kag duha ang patay nga na-report.
Nahibaluan nga ang ini nga outbreak nagatuga sang Bundibugyo strain sang Ebola virus nga wala pa sang naaprubahan nga bakuna ukon bulong.
Padayon naman nga nagaatubang sang kabudlayan ang mga awtoridad sa contact tracing bangud sang kalayuon sang mga lugar, kakulangan sa seguridad, kag padayon nga pagsaylo sang mga residente.
Ginabulubanta nga may yara sang 17,000 tubtob 35,000 ang possible nga na close contact sang mga may kumpirmado nga kaso, apang mga 4,000 pa lamang ang nakilal-an kag ginabantayan sang mga health worker.
Dugang naman nga pagpanghangkat ang kakulangan sa pondo kag personnel.
Sa kapin $900 milyon nga ginpromisa para sa pakigbatuan ang outbreak, mga $90 milyon pa lamang ang narelease.
Kinahanglan man sang Africa CDC ang 540 ka personnel para sa operasyon, apang 84 pa lamang ang yara sa field sa karon.
Nagpahanumdom ang mga eksperto nga malayo pa nga ma-control ang sitwasyon kag nagapanawagan naman ang Democratic Republic of Congo sang madali nga pag-release sang pondo kag dugang nga bulig agud mapunggan ang paglala sang amo nga outbreak.
