Malip-ot lang ang nabatyagan nga kalinong sa Israel kag Gaza City bangud liwat naman nga nagbalik ang bombahanay, pagpalupad sang rockets, kag pag-atake sang mga warplanes.
Sa mga banwa sa West Bank, nagtipon ang grupo sang mga Palestinians lakip na ang Hamas militants agud manawagan sang mass strikes.
Suno sa Palestine Liberation Organization, ang prayoridad sang Palestinian political leadership amo nga makumbinse ang Israel nga untaton na ang pagpamatay kag pagmassacre sa mga tawo sa Gaza.
Suno sa Gaza Ministry of Health, nagsaka na sa 213 ka tawo ang patay lakip na ang 61 ka kabataan samtag 1,400 naman ang napilasan bangud sang hitabo.
2,500 ka Palestinians ang wala na sang balay subong samtang 52,000 ang makonsiderar nga displaced suno sa United Nations. 450 naman ka mga building ang naguba.
Suno kay Bombo International Correspondent Jhane Sia, tumandok sang Cavite kag subong yara sa Ashkelon, Israel, wala sila sang bomb shelter sa ila nga balay gani nga sa kilid lang siya sang pader nagapanago.
Suno kay Sia, halos lima ka asud-asud nga siren ang iya nga nabatian sa sulod lang sang isa ka adlaw.
Halos isa ka semana naman nga wala siya sang tulog bangud Lunes sang nagligad nga semana nag-umpisa ang masingki nga away.
Kahapon, sa ila nga lugar, isa ang patay kag apat ang kritikal ang kondisyon.
Bangud sa nagasingki nga away sa tunga sang Israel kag militante sa Gaza, padayon man ang panawagan sang iban nga mga pungsod sang ceasefire. Lakip sa nagasuporta sa ceasefire amo sanday German Chancellor Angela Merkel kag US President Joe Biden. #
