ILOILO CITY – Napasaka na ang kaso nga murder batuk kay suspended Negros Oriental Representative Arnolfo “Arnie” Teves Jr. kag sa lima ka iban pa may kaangtanan sa pagpamatay nga natabo sa probinsya sang 2019.
Suno kay Prosecutor General Benedicto Malcontento, kahapon sang hapon napasaka ang kaso.
Magluwas kay Teves, ginpasakaan man sang kaso sanday Hannah Mae Sumerano, Richard “Boy” Cuadra, Jasper “Bobong” Tanasan, Alex Mayagma, kag Rolando Pinili.
Ang kaso ang nag-ugat sa kamatayon nanday Michael Dungog nga anay board member sa third district sang Negros Oriental; Lester Bato, bodyguard ni Basay mayoralty candidate Cliff Cordoval; kag Pacito Libron nga gina-alegar hitman.
Una na nga ginpahayag sang kampo ni Teves nga wala na sila nakibot sa desisyon sang gobyerno nga magpasaka sang kaso.
Si Teves ang ginatudlo man nga mastermind sa kamatayon ni Negros Oriental Governor Roel Degamo kag sang siyam ka iban pa. Ini ang makapila ka beses nga ginpanginwala ni Teves.
Sang damlag lang, gin-designate sang Anti-Terrorism Council si Teves kag ang 12 ka iban pa bilang terorista.
Wala pa ini sa gihapon nakabalik sa pungsod bangud sa kahangawa sa iya seguridad.
