ILOILO CITY- Gin-athag sang Department of Health nga indi pa kinahanglan nga magdeklara sang outbreak sang Japanese Encephalitis sa Western Visayas apisar nga may yara na sang 25 ka mga kaso sang nasambit nga balatian.
Ang Japanese Encephalitis ang halin sa kagat sang lamok nga tumalagsahon nga balatian apang mataas ang case fatality rate.
Lakip sa mga sintomas sang balatian amo ang hilanat, sakit sang ulo, sakit sang tiyan, pagpalanglapsi, kag kakapoy.
Sa interview sang Bombo Radyo Kay Dr. Mary Jane Juanico-Esteva, Medical Officer IV sang Department of Health Region 6, iya ginpahayag nga kun lantawon ang mga kaso nga narecord, may tag- isa lang sa kada banwa kag wala man nagapunsok ukon hinali ang pagdamo sang kaso.
Sa pihak sini, nagapadayon ang monitoring sang Regional Epidemiology and Surveillance Unit kun nagadamo ang kaso sang Japanese Encephalitis.
Suno Kay Dr. Juanico- Esteva, indi luyag sang ahensya nga magtuga sang panic sa mga pumuluyo gani ginatinguhaan gid nila nga insakto man nga impormasyon ang ila mahatag sa publiko.
Nahibaluan nga may yara sang 256 samples nga ginpadala sa Department of Health sub-national laboratory agud ipaidalom sa confirmatory test apang 25 pa lang ang napagwa nga resulta.
