Gintamyaw kag ginpangamusta ni King Charles ang mga tawo kasunod sang church service nga iya gintambungan sa Windsor kadungan sang Easter Sunday.
Ini ang iya labing-una nga pagpakita sa publiko sa isa ka royal event halin sang gin-anunsyo sang Buckingham Palace sang Pebrero nga na-diagnose siya nga may cancer.
Nakit-an nga nagayuhom ang 75-anyos nga hari kag upod sini si Queen Camila samtang nagpangamusta sa mga tawo sa guwa sang St George’s Chapel nga amo man ang ulihi nga palahuwayan sang iya nagtaliwan nga iloy nga si Queen Elizabeth.
Wala naman nakaupod sa royal couple si Prince William kag iya asawa nga si Kate Middleton. Sang nagligad nga semana, matandaan nga gin-anunsyo man sang Princess of Wales nga nagapaidalom siya sa “preventative chemotherapy” matapos nga na-diagnose man ini nga may cancer.
Ang public appearance sang hari ang indi man makabig nga magabalik na ini sa iya nga royal duties bangud kinahanglan pa sini nga magpaidalom sa outpatient treatment.
“We pray for her and the King in their dignified response and we pray for all those who are suffering the same way,” suno kay Archbishop of Canterbury, Reverend Justin Welby, sa iya nga Easter sermon sa Canterbury Cathedral sang amo nga adlaw.#
