ILOILO CITY- Nagpakita na sa pinakauna nga tinion si King Charles humalin sang naglapta ang report nga ginbawian na ini sang kabuhi may kaangtanan sa pag-diagnose sa iya nga may cancer.
Nakit-an ang 75-anyos nga hari nga sakay sa kotse pagwa sa Windsor Castle.
Mapagsik ang hari suksok ang iya suit samtang nagapungko sa likod sang Bentley vehicle kag ginamaneho sang police escort halin sa iya Berkshire home padulong sa Clarence House sa Westminster sa London.
Nakit-an ini nga naga- wave sang iya kamot sa publiko.
Nagpadulong ini sa Buckingham Palace kun sa diin gin-abi-abi niya ang pila ka mga veterans sang Korean War agud markahan ang ika – 70 nga anibersaryo sang amo nga inaway.
Ini nga public appearance sang hari ang kasunod man sang pagpalapta sang pila ka Russian news sites kag associated social media accounts nga napatay na ang hari bilang resulta sang cancer complications.
Kasunod naman sang public appearance sang hari, isa ka video man ang naggwa kun sa diin makit-an si Kate, Princess of Wales kaupod si Prince William.
Nahibaluan nga umpisa sang nagpaidalom ini sa surgery, wala na ini makit-an sang publiko sa sulod sang malapit tatlo ka bulan.
