Nagtaliwan na sa edad nga 57 ang anay komedyante nga si Bayani Casimiro Jr., nga mas kilala bilang si Prinsipe K (Kahilingan) sa sitcom nga “Okay Ka, Fairy Ko!”
Suno sa iya utod nga si Marilou Casimiro, napatay ang aktor sang Hulyo 25, 2025 bangud sang cardiac arrest.
Si Bayani amo ang anak sang beterano man nga actor-dancer nga si Bayani Casimiro Sr. nga ginbansagan nga “Fred Astaire of the Philippines”.
Magluwas sa “Okay Ka, Fairy Ko!” kaupod sanday Vic Sotto, Tweetie de Leon, Ruby Rodriguez, kag Alice Dixson, kag iban pa, nagbida man ang bata nga Bayani sa Okay Ka, Fairy Ko! Part 2 sang 1992.
Pagkatapos sina, nag-upod ini sa madamo pa nga mga pelikula nga ginapangunahan ni Sotto kag nangin regular nga parte sang Enteng Kabisote franchise.
Nagpakita siya sa Enteng Kabisote: Okay Ka, Fairy Ko… The Legend (2004), Enteng Kabisote 2: Okay Ka Fairy Ko… The Legend Continues (2005), Enteng Kabisote 3: Okay Ka, Fairy Ko: The Legend Goes On and On and On (2006), kag Si Agimat at si Enteng Kabisote (2010).
Isa sa mga ginbidahan niya amo ang pelikula nga M.O.N.A.Y., nga ginsulat, gin-direct, kag ginbidahan ni Jun Urbano.
Yara subong ang bangkay niBayani Jr. sa St. Peter’s Memorial Chapel sa Sucat, Parañaque City, kag nakaschedule ang cremation kag lubong sa Loyola Memorial Park sa Parañaque City buwas, Hulyo 30.#
