Igapasa ni Ombudsman Jesus Crispin “Boying” Remulla sa Kamara ang Statements of Assets, Liabilities and Net Worth (SALNs) ni Vice President Sara Duterte.
Ini bilang pagtuman sa request sang House Justice Committee nga nagahingyo sang kopya sang SALN ni Duterte sa tuig 2022 tubtub 2025, 2007 tubtub 2013, kag 2016 tubtub 2022.
Ini nga request ang gin-isyu sang panel kaangot sa beripikado na nga impeachment complaints batok sa vice president.
Suno kay Remulla, ipasa sini ang SALN, apang apisar nga gin-subpoena siya, indi siya personal nga makatambong sa hearing sa Abril 14.
Pahayag ni Remulla, ipadala sini ang SALN custodian sang Office of the Ombudsman para sa amo nga hearing sa masunod nga semana. Ini nga officer suno kay Remulla ang may yara sang personal nga ihibalo sa mga request sang mga kongresista.
“The custodian of the SALN will be the one to bring them. I will not attend personally because I am not the one holding those documents. The officer who has custody will bring them, as that person has personal knowledge of the records being requested,” pahayag sini sa press briefing.
Matandaan nga ang nagpaguwa sang subpoena amo sanday House Speaker Faustino Dy III, Justice Committee chairperson Rep. Gerville Luistro, kag Secretary General Cheloy Garafil.
Ginrason sang committee nga kinahanglan ini nga dokumento agud nga marepaso ang gindeklarar ni Duterte sa SALN bilang kabahin sang evaluation sang impeachment complaints.
Magluwas sa document request, ginmandu man sang panel nga dapat magtambong sa hearing si Ramil Madriaga nga amo ang nag-alegar nga nag-akto bilang “bagman” sadto ni Duterte.#
