Nagmandu na ang Manila Regional Trial Court Branch 51 sa Department of Foreign Affairs (DFA) para sa kanselasyon sang passport ni anay Negros Oriental representative Arnolfo “Arnie” Teves Jr. nga amo ang gina-alegar nga mastermind sa pagpatay kay anay Negros Oriental governor Roel Degamo.
Sa 14 ka pahina nga order sang korte, ginmanduan man ang National Bureau of Investigation (NBI) nga pangitaon si Teves kag dal-on pabalik diri sa Pilipinas.
Suno pa sa korte, na-establisar sang prosecution nga isa ka pugante ang anay mamalidha kag kinahanglan man nga butangan sang retrictions ang iya byahe para sa ngalan sang public safety.
Gin-cite man sang korte ang resolution sang Anti-Terrorism Council nga naga-designar kay Teves kag sa iya armado nga grupo nga mga “terrorist individuals” nga parte sang “terrorist group of persons, organization or association”.
Ginsiling man sang korte nga sang Marso 4, 2023 — tion nga ginpatay si Degamo kag iban pa sa Pamplona, Negros Occidental — yara si Teves sa Estados Unidos sang Amerika kag may dala nga travel authority nga naga-cover sang period nga Pebrero 9, 2023 tubtub Marso 9, 2023.
Ginlauman kuntani nga magabalik ini sa Pilipinas kun mag-expire na ang iya travel authority apang wala ini nagpauli.
Nag-isyu man ang korte sang warrant of arrest sang Septyembre 2023.
Sa normal nga mga dalagan sang kaangay nga events, kun may warrant of arrest na suno sa korte, duha ka bagay ang nagakatabo — nagasungka ang akusado ukon gina-aresto sang otoridad.
Dugang pa sang Regional Trial Court, lain ang natabo sa kaso ni Teves bangud wala sini ginarespeto ang korte kag ang layi paagi sa pagpamalibad nga magpauli kag mag-atubang sa iya kaso.
Nagpaguwa naman sang statement ang Department of Justice (DOJ) nga indi sini pagtugutan nga makapalagyo sa layi ang mga indibidwal nga may nahimo nga masingki nga krimen.
Sa separado naman nga statement sang kampo ni Teves, ginpahayag sang legal counsel nga si Atty. Ferdinand Topacio nga indi pa final and executory ang mandu sang korte kag may legal pa nga mga paagi agud nga mabaliskad ini nga order.
Nahibaluan nga ginkasuhan man si Teves sa gin-alegar pag-finance sa terorismo.
Magluwas sa kaso nga pagpatay kay Degamo, may separado man ini nga warrant of arrest sa murder case kaangot sa kamatayon sang tatlo ka mga tawo sa Negros Oriental sang 2019.
Naghingyo man anay ang DOJ sa Interpol nga magpaguwa sang “red notice” alert sa mga pungsod agud nga ma-aresto ang former solon. Ulihi ini nga nakit-an nga nagatinir sa Timor Leste.#
