ILOILO– Amat-amat na nga nagpasa sang ila mga re entry action plan ang mga barangay officials nga naka upod sa ginpatigayon nga Lakbay Aral sang gintalikdan nga Setyembre 3-7.
Madumduman nga gin require nga magpasa sang action plan ang kada barangay nga may yara sang barangay official nga naka upod sa ginpatigayon nga Lakbay Aral, samtang terminal report naman ang nagakadapat ipasa sang Liga ng mga Barangay.
Sa interview sang Bombo Radyo kay City Department of Interior and Local Government Officer Roy Defiño , iya ginpahayag nga yara na sa 20% ang nakapasa sang nasambit nga mga report.
Gin athag ni Defiño nga katungdanan sang mga barangay officials sa kada barangay ang magpasa sang re entry action plan kun sa diin nakabutang ang mga natun-an nila sa Lakbay Aral, proposed projects nga naka base sa natun-an nila, funding kag kun diin sila makuha sang pondo.
Samtang katungdanan naman sang Liga ng mga Barangay nga mag pasa sang terminal report kun sa diin nagakadapat nila ibutang ang kabilugan nga natabo kag nagasto sa Lakbay Aral.
Suno kay Defiño sa tion nga indi makapasa ang mga barangay sang nasambit nga report, indi na mahimo pa nga pag aprobahan sang City DILG ang masunod nga Lakbay Aral.
Dugang sang natungdan, wala na sang mahimo ang City DILG kun indi ma implementa sang kada barangay ang mga proyekto nga ila gin propose sa ila nga action plan bangud ang katungdanan lang nila amo ang mag monitor kag maghatag sang pahanumdom.
